دعوة للفرح
كتبت : لبنى غانم
كل اللي ضايقوك وجرحوك، عاشوا حياتهم عادي وانت مفرقتش معاهم، محدش بيخسر غيرك، إنت اللي شايل الهم والحزن لوحدك، محدش حاسس باللي جواك، هما هناك فرحانين ومبسوطين، حتة الإحساس بالذنب وتأنيب الضمير اللي كانت مصبراك، خلاص مبقوش يحسوا بيها ، مش آن الآون تفوق بقى وتعيش حياتك إنت كمان.
آن الأوان تحط نقطة وتكتب من أول السطر بداية تليق بيك، بداية مفيهاش ندم على اللي راح ، لأن الندم ع اللي فات هيضيع اللي جاي، فمتندمش على أي حاجة حلوة عملتها لغيرك ومقدرهاش و لا تندم على مشاعر صادقة وجميلة قدمتها ومتقدرتش، كل الحاجات الحلوة والمشاعر الجميلة دي كلها هتتردلك اضعاف من ناس تانيين، ازعل بس لو عملت حاجة وحشه في حق حد و ازعل أوي كمان لأنها هتتردلك بشكل يوجعك أوي..
آن الآوان تفرح، وتعرف إن الفرح قرار، قرر من جواك تبقى مبسوط ..اصنع حالة من الفرح حواليك ..كسر كل قيود حزنك الي مكتفاك واتمرد على نفسك وعلى أحزانك، ابتسم وافتكر الحاجات الحلوة اللي في حياتك هات ورقة وقلم واكتب ايه الحاجات اللي بتخليك مبسوط واعملها،شوف مين الناس اللي حواليك بتلاقي في وسطهم البهجة وقرب منهم انت تستحق تفرح مهما كانت أحزانك انت أقوى منها متقولش لنفسك فترة وهتعدي وتستلم وتلاقي عمرك ضاع في الحزن ، اللحظات الحلوة انت اللي هتصنعها بإرادتك ..واوعى تخاف، الخوف بيكتف أحلامك وقادر يوقف حياتك ويغير مسار مستقبلك... افرح بقى
=
بلغ الادارة عن محتوى مخالف من هنا ابلغون على الروابط التي لا تعمل من هنا
الإثنين 6 يوليو - 1:45
